डोल्पामा पाँच वर्षदेखि रोकिएको पुल निर्माण बारे छलफल

प्रारम्भिक सम्झौता भएको पाँच वर्ष बितिसक्दा पनि निर्माण कार्य अगाडि बढ्न सकेको छैन। यसअघि पनि यस आयोजनामा उठेका विभिन्न आपत्तिहरूलाई सम्बोधन गर्न स्थानीय बासिन्दाहरूसँग छलफलहरू भइसकेका छन्। विकास निर्माणका काम रोक्न विभिन्न बाहनाहरू बनाउन नहुने अधिकारीहरूको भनाइ छ। डोल्पाकी प्रमुख जिल्ला अधिकारी जुनु हमाल ढकालको नेतृत्वमा एक बैठक आयोजना गरिएको थियो। उक्त छलफलमा इञ्जिनियरहरू, पुल क्षेत्रका प्रमुख, ठेकेदार, भेरी करिडोरका प्रतिनिधिहरू र स्थानीय बासिन्दाहरूको सहभागिता रहेको थियो। छलफलका क्रममा प्रमुख जिल्ला अधिकारीले असहमति अन्त्यका लागि आवश्यक समन्वय र पहलकदमी लिने बताएकी छिन्। आफ्ना मागहरू अनुसार पूर्वाधार निर्माण हुने सुनिश्चितता भएमा सहयोग गर्न तयार रहेको स्थानीय बासिन्दाहरूले बताएका छन्। छलफल पश्चात् सरोकारवालाहरूले निर्माण कार्यलाई अगाडि बढाउन थप अध्ययन गर्ने, समन्वय गर्ने र आवश्यक संवादहरूलाई निरन्तरता दिने सहमति गरेका छन्।