म्यानचेस्टर युनाइटेड र लिड्स युनाइटेडको १-१ बराबरी, जितविहीन यात्रा छ खेल पुग्यो

म्यानचेस्टर युनाइटेडले इङ्लिस प्रिमियर लिग अन्तर्गत आइतबार राति सम्पन्न खेलमा लिड्स युनाइटेडसँग १-१ गोलको बराबरी खेल्दै आफ्नो खराब लयलाई निरन्तरता दिएको छ। लिड्सको घरेलु मैदानमा भएको यो नतिजासँगै म्यानचेस्टर युनाइटेड सबै किसिमका प्रतियोगिताहरूमा गरी लगातार छ खेलसम्म जितविहीन बन्न पुगेको छ। यसअघि म्यानचेस्टर युनाइटेडले मङ्गलबार च्याम्पियन्स लिग अन्तर्गत एट्लेटिको मड्रिडविरुद्ध प्रतिस्पर्धा गरेको थियो। उक्त खेल सुरु भएको पहिलो मिनेटमै टोलीले सुरुवाती गोल खाएको भए पनि पछि सम्हालिँदै बराबरी गोल फर्काउन सफल भएको थियो। टोलीले आइतबार लिड्सविरुद्धको खेलमा पनि उस्तै खालको प्रदर्शन दोहोर्‍याएको थियो। टोलीको लगातारको खस्कँदो खेल प्रदर्शनलाई लिएर फुटबल विश्लेषक तथा पूर्व खेलाडी जेमी क्यारागरले गम्भीर चिन्ता व्यक्त गरेका छन्। लिड्स युनाइटेडजस्तो टोलीविरुद्धको बराबरी नतिजालाई सन्तोषजनक मान्नुले नै म्यानचेस्टर युनाइटेडको खस्कँदो स्तर र स्तरहीनतालाई प्रस्ट पार्ने टिप्पणी उनले गरेका छन्।