एनआईसी एसिया क्यापिटलले म्युचुअल फन्डको आकार रु. १ अर्ब पुर्‍यायो

एनआईसी एसिया क्यापिटलले आफ्नो 'एनआईसी एसिया इक्विटी अपर्चुनिटी फन्ड' को कुल आकार रु. ८० करोडबाट बढाएर रु. १ अर्ब पुर्‍याएको छ। योजना तथा बिक्री प्रबन्धकको रूपमा रहेको क्यापिटलले सार्वजनिक निष्कासनका क्रममा सुरुमा प्रस्ताव गरिएको इकाइभन्दा बढी माग भएपछि यो परिमार्जन गरेको हो। नेपाल धितोपत्र बोर्डबाट स्वीकृत विवरणपत्र तथा सामूहिक लगानी कोष नियमावली, २०६९ को व्यवस्थाअनुसार यो समायोजन गरिएको हो। उक्त कानुनी प्रावधानले मागभन्दा बढी आवेदन परेमा योजनाको कुल आकारलाई २५ प्रतिशतसम्म बढाएर थप इकाइहरू बाँडफाँट गर्न अनुमति दिन्छ। निष्कासन कार्य सफलतापूर्वक सम्पन्न भएपछि क्यापिटलले नेपाल धितोपत्र बोर्ड, सीडीएस एन्ड क्लियरिङ लिमिटेड, सी-आस्वा सदस्य बैंक तथा वित्तीय संस्थाहरू र सम्पूर्ण लगानीकर्ताहरूलाई धन्यवाद ज्ञापन गरेको छ। यो योजना एनआईसी एसिया क्यापिटलको छैटौँ बन्दमुखी म्युचुअल फन्ड योजना हो।