ऋषि धमलाद्वारा खरिपाटीका भूमिहीन परिवारलाई ३७ हजार रुपैयाँ सहयोग

वरिष्ठ पत्रकार एवम् स्वतन्त्र नागरिक अभियान नेपालका संयोजक ऋषि धमलाले सोमबार खरिपाटीमा रहेको भूमिहीन होल्डिङ सेन्टरको भ्रमण गरेका छन्। भ्रमणका क्रममा धमलाले त्यहाँ बसोबास गरिरहेका परिवारहरूसँग छलफल गर्दै उनीहरूको वर्तमान जीवनयापनको अवस्था र आसन्न दसैँ पर्वको तयारीका विषयमा जानकारी लिएका हुन्। छलफलका क्रममा सो केन्द्रमा बस्दै आएका व्यक्तिहरूले सरकारबाट पाउनुपर्ने राहत सहयोग नपाएकोमा चिन्ता व्यक्त गरे। सरकारले उपलब्ध गराउने भनेको रु. २५,००० राहत रकम हालसम्म प्राप्त नभएको उनीहरूले बताएका छन्। विगत तीन महिनादेखि उक्त होल्डिङ सेन्टरमा रहँदै आएका परिवारहरूले आफ्नो पुनःस्थापना र उचित व्यवस्थापनका लागि व्यवस्थित पहल गरिदिन माग गरेका छन्। दसैँ पर्व मनाउनका लागि सहयोग पुर्‍याउने उद्देश्यले धमलाले खसी खरिद गर्न भन्दै कुल रु. ३७,००० नगद आर्थिक सहायता प्रदान गरेका छन्। उनले सो रकम होल्डिङ सेन्टरका प्रमुख राजु ग्लानलाई औपचारिक रूपमा हस्तान्तरण गरेका हुन्।