थाइल्यान्डमा वैभवीले जितिन् तेक्वान्दोमा दुई रजत पदक

थाइल्यान्डमा सम्पन्न १४ औँ रोयल प्रिन्सेस कप अन्तर्राष्ट्रिय तेक्वान्दो च्याम्पियनसिपमा तेक्वान्दो खेलाडी वैभवी सापकोटाले उत्कृष्ट प्रदर्शन गर्दै दुई वटा रजत पदक जितेकी छन्। बैंककस्थित महिडोल विश्वविद्यालय परिसरमा रहेको स्पोर्ट्स हलमा प्रतियोगिताका खेलहरू सञ्चालन भएका थिए। च्याम्पियनसिपमा प्रभावकारी खेल प्रस्तुत गर्दै वैभवीले पुम्से र क्योरुगी दुवै विधामा दोस्रो स्थान हासिल गर्न सफल भएकी हुन्। थाई राजधानी बैंककमा आयोजित यस अन्तर्राष्ट्रिय प्रतियोगितामा विभिन्न देशका खेलाडीहरूले प्रतिस्पर्धा गरेका थिए। प्रतियोगितामा आयोजक थाइल्यान्डका साथै फिलिपिन्स, भियतनाम, चीन, भारत, लाओस, कम्बोडिया, टर्की, ब्राजिल, संयुक्त राज्य अमेरिका, रुस, इन्डोनेसिया र सिङ्गापुर लगायतका मुलुकका खेलाडीहरूको सहभागिता रहेको थियो। वैभवीले बैंककस्थित अल स्टार तेक्वान्दो एकेडेमीको प्रतिनिधित्व गर्दै प्रतियोगितामा भाग लिएकी हुन्। उनी विशेष प्रशिक्षणका लागि सो एकेडेमीमा भर्ना भएकी थिइन्। विश्वविद्यालयको कभर्डहालमा भएको खेलमा उत्कृष्ट प्रदर्शन गरेपछि उनलाई थाइल्यान्ड तेक्वान्दो सङ्घले सदस्यता समेत प्रदान गरेको छ।