आईसीसी विश्वकप लिग २: नेपालद्वारा ओमान १० रनले पराजित

आईसीसी पुरुष क्रिकेट विश्वकप लिग २ शृङ्खलाको आफ्नो अन्तिम खेलमा नेपालले घरेलु टोली ओमानविरुद्ध १० रनको रोमाञ्चक जित हात पारेको छ। ओमानस्थित अल अमेरात क्रिकेट ग्राउन्ड मिनिस्ट्री टर्फ १ मा सोमबार सम्पन्न खेलमा नेपालले पहिले ब्याटिङ गर्दै २८० रन जोडेको थियो। टस जितेर ब्याटिङ रोजेको नेपालले पूरै ५० ओभर खेल्दै आफ्ना सबै १० विकेट गुमाएर ओमानसामु २८१ रनको विजयी लक्ष्य प्रस्तुत गरेको थियो। नेपालको इनिङ्स सम्हाल्न रोहित पौडेल, दीपेन्द्रसिंह ऐरी र देव खनालले अर्धशतकीय योगदान पुर्‍याएका थिए। टोलीका लागि सर्वाधिक रन बनाएका रोहितले ६१ बलमा छक्का प्रहार गर्दै आफ्नो अर्धशतक पूरा गरेका थिए भने कुल ८० रन जोडे। यस्तै आक्रामक ब्याटिङ गरेका दीपेन्द्रले ४७ बलमै ३ चौका र ३ छक्काको मद्दतमा अर्धशतक प्रहार गर्दै ६९ रन बनाए। नेपालले दिएको २८१ रनको लक्ष्य पछ्याउँदै मैदान उत्रिएको ओमानले निर्धारित ५० ओभरमा ७ विकेट गुमाउँदै खेल समाप्त गर्‍यो। ओमानलाई रोक्न सफल भएसँगै नेपालले १० रनको जित दर्ता गर्दै जारी शृङ्खलाको अन्तिम खेल आफ्नो पक्षमा पारेको छ।