आईसीसी विश्वकप लिग-२ : ओमानमाथि नेपालको १० रनको जित

आईसीसी क्रिकेट विश्वकप लिग-२ अन्तर्गत अल अमेरत मैदानमा सम्पन्न खेलमा नेपालले घरेलु टोली ओमानविरुद्ध १० रनको रोमाञ्चक जित हासिल गरेको छ। टस जितेर पहिले ब्याटिङ रोजेको नेपाली टोलीले निर्धारित ५० ओभर सकिन एक बल बाँकी छँदा २८० रन बनाएर अलआउट भयो। पूर्वकप्तान रोहित पौडेलले ८० रनको योगदान दिए भने देव खनालले ५७ रन र दीपेन्द्रसिंह ऐरीले ६९ रन जोड्दै ओमानलाई २८१ रनको लक्ष्य दिएका थिए। लक्ष्य पछ्याउने क्रममा ओमानले ५० ओभरमा ७ विकेट गुमाएर २७० रन बनाउन सक्यो। ओमानका लागि जतिन्दर सिंहले ८९ रन र हम्माद मिर्जाले ८७ रन बनाए। खेलको अन्त्यतिर हसनैन शाहले अविजित ४० रन जोडे पनि दीपेन्द्रसिंह ऐरीले अन्तिम ओभरमा गरेको किफायती बलिङका कारण नेपालले १० रनको जित निश्चित गर्‍यो। यस जितसँगै नेपाल लिग तालिकाको छैटौँ स्थानमा उक्लिएको छ। ओमानमा आयोजित शृङ्खलाको अन्तिम खेलको यो सकारात्मक नतिजाले नेपालको एकदिवसीय अन्तर्राष्ट्रिय मान्यतालाई निरन्तरता दिने सम्भावना उल्लेखनीय रूपमा बढाएको छ।