आहा रारा पोखरा गोल्डकप माघ ५ देखि १६ गतेसम्म सञ्चालन हुने

आहा रारा पोखरा गोल्डकप फुटबल प्रतियोगिताको छब्बीसौँ संस्करण आगामी २०८३ साल माघ ५ गतेदेखि १६ गतेसम्म सञ्चालन गरिने भएको छ। आयोजक सहारा क्लब पोखराले पोखरा रङ्गशालामा आयोजना हुने आगामी प्रतियोगिताको मिति सार्वजनिक गरेको हो। खेलकुदको विकासका लागि सहकार्य गर्ने र पोखरालाई खेल पर्यटन सहरका रूपमा स्थापित गर्ने मूल ध्येयका साथ यो प्रतियोगिता सञ्चालन हुँदै आएको छ। क्षेत्रीयस्तरमा खेलकुदको विकास र पर्यटन प्रवर्द्धनका साथै राष्ट्रिय फुटबलको स्तर उकास्न यस प्रतियोगिताले निरन्तर योगदान पुर्‍याएको क्लबले जनाएको छ। पोखरा महानगरपालिकाको संरक्षकत्वमा आयोजना हुने यस प्रतियोगितालाई विभिन्न सङ्घसंस्थाले निरन्तर सहयोग उपलब्ध गराउँदै आएका छन्। सहयोग गर्ने निकायहरूमा राष्ट्रिय खेलकुद परिषद्, गण्डकी प्रदेश खेलकुद परिषद्, अखिल नेपाल फुटबल सङ्घ, नेपाल पर्यटन बोर्ड, कास्की जिल्ला खेलकुद विकास समिति तथा कास्की जिल्ला फुटबल सङ्घ रहेका छन्। प्रतियोगिता आयोजना गरेर प्राप्त हुने बचत रकम सहारा क्लब पोखराले आफ्नै फुटबल एकेडेमी सञ्चालनका लागि उपयोग गर्ने गर्दछ। मिति र खेल मैदान तय भइसकेको भए तापनि सहभागी हुने टोलीहरू, खेल तालिका, पुरस्कार राशि र प्रायोजकहरूबारे विस्तृत जानकारी पछि सार्वजनिक गरिने क्लबले स्पष्ट पारेको छ।