भ्रमणका लागि तयार काभ्रेपलाञ्चोकको कोत्थुम्का

काभ्रेपलाञ्चोक जिल्लाको मण्डनदेउपुर नगरपालिका वडा नम्बर १० मा पर्ने कोत्थुम्कामा सफा मौसमका बेला सगरमाथासहित उत्तरतर्फका हिमशृङ्खला प्रस्ट अवलोकन गर्न सकिन्छ। यहाँ बुद्ध पार्क र विशेष प्रतिमा स्थापना गरिएसँगै घुम्न आउनेहरूको ध्यान खिच्न थालेको छ। स्थानीय शिक्षक शालिकराम पराजुलीसहितका बासिन्दाले यस क्षेत्रमा थप पूर्वाधार आवश्यक रहेको औँल्याउँदै स्थानीय समुदाय र संघीय सरकार दुवैलाई थप विकास निर्माणका कार्य अगाडि बढाउन आग्रह गरेका छन्। समग्र क्षेत्रको महत्त्व उजागर गर्दै मुख्य आकर्षणको प्रवर्द्धनले आन्तरिक र बाह्य दुवै पर्यटकलाई आकर्षित गर्न सक्ने स्थानीयको भनाइ छ। तत्कालीन चण्डेनी मण्डन, महादेवस्थान, ज्यासिथोक र ज्याम्दी गरी चारवटा गाउँ विकास समिति मिलेर बनेको यस मण्डनदेउपुर नगरपालिका क्षेत्र अन्तर्गतको नजिकैको थानडाँडाले घुम्न आउने पर्यटकलाई भरपर्दो वासस्थान र खानेपानीको सुविधा प्रदान गर्दै आएको छ। पराजुलीका अनुसार बौद्ध धर्मावलम्बीहरूले यस क्षेत्रलाई समाधि बुद्ध पर्वतका रूपमा समेत चिन्ने गर्छन्।