चाडपर्वका बेला काठमाडौं उपत्यकामा बढ्यो यातायातको चाप

विजयादशमीका अवसरमा मान्यजनबाट टीका तथा जमरा थाप्न र आफन्त भेट्न हिँड्नेहरूको संख्या बढेसँगै काठमाडौं, भक्तपुर र ललितपुरका मुख्य सडकहरूमा सवारीसाधनको चाप स्पष्ट रूपमा देखिएको छ। रामशाहपथस्थित काठमाडौं उपत्यका ट्राफिक प्रहरी कार्यालयका अनुसार पछिल्ला दुई-तीन दिनको तुलनामा सडकमा सवारीको संख्यामा उल्लेख्य वृद्धि भएको छ। प्रहरी उपरीक्षक नरेशराज सुवेदीले सवारीको चाप बढे पनि राजधानीका सबै प्रमुख सडक करिडोरहरू र मुख्य प्रवेशद्वारहरूमा यातायातका साधनहरू सामान्य अवस्थामा नै सञ्चालन भइरहेको जानकारी दिएका छन्। फूलपाती, अष्टमी र नवमीको तुलनामा विजयादशमीको दिन सडकको गतिविधिमा ह्वात्तै परिवर्तन आएको छ। छुट्टीको अवधिमा काठमाडौं उपत्यकाबाट करिब १० लाख मानिस बाहिरिएको सुरक्षा निकायले अनुमान गरेका छन्। चाडपर्व सकिएसँगै आगामी दिनहरूमा राजधानी फर्किने यात्रुहरूको चाप बढ्ने अपेक्षा गरिएको छ र सोही अनुसार मुख्य राजमार्ग तथा प्रवेशद्वारहरूमा यातायात व्यवस्थापन योजना मिलाइने अधिकारीहरूले बताएका छन्।