छ दिनको मर्मतपछि बेसीशहर-चामे सडक सञ्चालनमा

अवरुद्ध बेसीशहर-चामे सडक खण्ड छ दिनको निरन्तर प्रयासपछि यातायातका लागि पुनः सञ्चालनमा आएको छ। लगातारको वर्षाका कारण आएको बाढी र पहिरोले मनाङको यो मुख्य सडक खण्ड अवरुद्ध बनेको थियो। सडक खुलाउनका लागि मनाङ मर्स्याङ्दी हाइड्रोपावर कम्पनीले आवश्यक यन्त्र उपकरण, प्राविधिक जनशक्ति, डिजेल तथा अन्य सामग्री परिचालन गरेको थियो। बुटवल पावर कम्पनीका समन्वयकर्ता प्रतीकमान सिंह प्रधानका अनुसार करिब ६० किलोमिटर लामो यो सडक खण्ड छ दिनभित्रै मर्मत गरी सुचारु गरिएको हो। स्थानीय सडक पूर्वाधार निकाय र आसपासका अन्य जलविद्युत आयोजनासँगको सहकार्यमा उक्त मर्मत कार्य सम्पन्न गरिएको प्रधानले जानकारी दिए। चामेलगायत क्षेत्रमा नदीको बहावमा अवरोध सिर्जना हुँदा यातायात ठप्प भएको थियो। सडक सञ्चालनमा आएपछि हिमाली जिल्ला मनाङका बासिन्दालाई आवातजावतमा ठूलो राहत पुगेको छ। यस सडक खुल्दा मनाङका १३ वटा स्थानीय गाउँका करिब ५,६०० बासिन्दा प्रत्यक्ष रूपमा लाभान्वित भएको अधिकारीहरूले जनाएका छन्।