हिमालदेखि समुद्रसम्मको प्रारम्भिक चेतावनी प्रणालीमा नेपालको जोड

संयुक्त राष्ट्रसंघका लागि नेपालका स्थायी प्रतिनिधि लोकबहादुर थापाले हिमालय क्षेत्रका जोखिमहरूको एकीकृत र वास्तविक समयको ट्र्याकिङ विस्तार गर्न आह्वान गरेका छन्। आगामी COP31 अघि संयुक्त राष्ट्रसंघका महासभा अध्यक्षद्वारा आयोजित एक विशेष कार्यक्रममा वक्ताका रूपमा बोल्दै उनले यस क्षेत्रका वातावरणीय जोखिमहरू अनुगमन गर्न उन्नत प्रविधि र वैज्ञानिक अवलोकनको प्रयोग गर्नुपर्ने बताए। सत्रका दौरान राजदूत थापाले जलवायु चुनौतीहरूलाई कम गर्न क्षेत्रीय साझेदारीका साथै अन्तर्राष्ट्रिय ऐक्यबद्धता अपरिहार्य रहेको औंल्याए। न्युयोर्कस्थित संयुक्त राष्ट्रसंघका लागि नेपालको स्थायी नियोगले उनको भनाइ समेटेर जारी गरेको प्रेस विज्ञप्तिमा उच्च हिमालदेखि सागरीय वातावरणसम्मका संवेदनशील क्षेत्रहरूको रक्षाका लागि सहकार्यमा जोड दिइएको छ। देशको 'सगरमाथादेखि समुद्रसम्म' पहललाई पुनस्र्थापित गर्दै राजदूत थापाले समुदाय-केन्द्रित र प्रभावकारी प्रारम्भिक चेतावनी संयन्त्र विकास गर्ने नेपालको दृढता दोहोर्‍याए। उनले अन्तरसम्बन्धित जलवायु खतराबाट जनसङ्ख्याको सुरक्षा गर्न छिमेकी क्षेत्रहरूबीच वैज्ञानिक सहकार्य बलियो हुनुपर्नेमा जोड दिए।