विश्व प्रहरी सम्मेलनमा सहभागी हुन गृहमन्त्री सुदन गुरुङ युएई प्रस्थान

गृहमन्त्री सुदन गुरुङ युएईको दुबई शहरमा आयोजना हुन गइरहेको विश्व प्रहरी सम्मेलनमा भाग लिन शुक्रबार साँझ त्यसतर्फ प्रस्थान गरेका छन्। युएई सरकारबाट प्राप्त औपचारिक निमन्त्रणा स्वीकार गर्दै मन्त्री गुरुङ टोलीसहित प्रस्थान गरेको उनको सचिवालयले पुष्टि गरेको छ। यो अन्तर्राष्ट्रिय सम्मेलनले सुरक्षा प्रविधि र कानुन कार्यान्वयनका क्षेत्रमा भएका नवीनतम उपलब्धिबारे छलफल गर्न विभिन्न देशका प्रतिनिधिहरूलाई एकै ठाउँमा ल्याएको छ। सम्मेलनका क्रममा उच्चस्तरीय नीतिगत छलफल, प्राविधिक कार्यशाला, विषयगत सत्र तथा गोलमेच बैठकहरू आयोजना गरिनेछन्। यसका साथै विश्व प्रहरी पुरस्कार तथा प्रदर्शनी पनि कार्यक्रमको तालिकामा समावेश छ। सम्मेलनमा स्वायत्त रोबोट, ड्रोन, आर्टिफिसियल इन्टेलिजेन्समा आधारित प्रहरी सेवा, डिजिटल रुपान्तरण, र साइबर आक्रमण एवं वित्तीय ठगी नियन्त्रण जस्ता आधुनिक सुरक्षा चुनौतीबारे गहन विमर्श हुनेछ। यसपटकको कार्यक्रम १४ वटा मुख्य विषयगत क्षेत्रहरूमा केन्द्रित रहनेछ। जसमा आधुनिक फोरेन्सिक प्रविधि, अपराध अनुसन्धान, सूचना आदानप्रदान, क्रिप्टोकरेन्सी ट्र्याकिङ र वित्तीय अपराध नियन्त्रण जस्ता विषय छन्। यसका अतिरिक्त लागुऔषध तस्करी, संगठित अपराध, सीमा सुरक्षा, स्मार्ट सुरक्षा प्रणाली, उपग्रहमा आधारित सूचना र अन्तरिक्ष सुरक्षाका साथै रक्षा तथा संकट व्यवस्थापनका क्षमता वृद्धिबारे पनि सम्मेलनमा छलफल गरिनेछ।