काठमाडौँ गोर्खाजलाई हराउँदै सुदूरपश्चिम रोयल्स एनपीएलको प्लेअफमा

नेपाल प्रिमियर लिग (एनपीएल) अन्तर्गत १३ नोभेम्बर २०२६ (शुक्रबार) मा कीर्तिपुरस्थित त्रिभुवन विश्वविद्यालयको क्रिकेट मैदानमा भएको खेलमा सुदूरपश्चिम रोयल्सले काठमाडौँ गोर्खाजलाई सात रनले पराजित गर्दै प्लेअफमा आफ्नो स्थान सुरक्षित गरेको छ। टस हारेर पहिले ब्याटिङको निम्तो पाएको सुदूरपश्चिमले निर्धारित २० ओभरमा छ विकेट गुमाउँदै १२५ रन जोडेको थियो। टोलीले सुरुआतमै आठ रन जोड्दा चार विकेट गुमाएर कमजोर स्थितिमा पुगेको थियो। सुरुवाती झट्कापछि कप्तान दीपेन्द्रसिंह ऐरीले टोलीको इनिङ्स सम्हालेका थिए। उनले ५५ बलमा पाँच चौका र दुई छक्काको मद्दतमा ६० रन बनाए, जुन चालु प्रतियोगितामा उनको पहिलो अर्धशतक हो। तल्लो क्रमका ब्याटर थारिन्दु रत्ननायकेले २३ बलमा अविजित २६ रन बनाए भने फेबियन एलेन दुई रनमा अविजित रहे। काठमाडौँ गोर्खाजका बलर जाहाँदाद खानले तीन विकेट र सन्तोष यादवले दोहोरो सफलता प्राप्त गरे। १२६ रनको विजय लक्ष्य पछ्याएको काठमाडौँ गोर्खाजले २० ओभरमा सात विकेट गुमाएर ११८ रन मात्र बनाउन सक्यो। सुदूरपश्चिमका लागि अनिल खरेलले दुई विकेट लिए भने स्कट कुगेलाइन, फेबियन एलेन र हेमन्त धामीले एक-एक विकेट हात पारे। यो जितसँगै सुदूरपश्चिम रोयल्स लुम्बिनी लायन्ससँगै प्लेअफमा पुगेको छ। हारका बाबजुद काठमाडौँ गोर्खाज आठ अङ्कसहित तालिकाको तेस्रो स्थानमा छ भने विराटनगर किंग्स छ अङ्कसहित चौथो स्थानमा रहेको छ।