नेपाल प्रिमियर लिग: जनकपुर बोल्ट्सद्वारा पोखरा एभेन्जर्स नौ रनले पराजित

नेपाल प्रिमियर लिगमा जनकपुर बोल्ट्सले पोखरा एभेन्जर्समाथि नौ रनको रोमाञ्चक जित दर्ता गरेको छ। टोलीले पहिले ब्याटिङ गर्दै निर्धारित २० ओभरमा १४७ रन बनाएर पोखरासामू १४८ रनको लक्ष्य प्रस्तुत गरेको थियो। जनकपुरको इनिङ्सलाई तृतराज दासले ५५ बलमा ६१ रन बनाउँदै उकासेका थिए। उत्कृष्ट ब्याटिङ प्रदर्शनका लागि दासलाई 'प्लेयर अफ द म्याच' चुनियो। १४८ रनको जवाफी लक्ष्य पछ्याएको पोखरा एभेन्जर्सले २० ओभरमा नौ विकेट गुमाएर १३८ रन मात्र बनाउन सक्यो। पोखराका कप्तान कुशल भुर्तेलले आक्रामक ब्याटिङ गर्दै ३५ रन बनाए र सात ओभरमा टोलीलाई ५३ रनको स्थितिमा पुर्‍याएका थिए। तर उनी आउट भएपछि अन्य ब्याटरहरूले गतिलो साथ दिन नसक्दा पोखरा पराजित हुन पुग्यो। यो हारसँगै प्रतियोगितामा पोखराको लगातार दोस्रो हार दर्ता भएको छ। यसअघि सुदूरपश्चिम विरुद्धको खेलमा पोखराले २० ओभरमा सात विकेट गुमाएर १४५ रन बनाएको थियो, जसलाई सुदूरपश्चिमले सफलतापूर्वक पछ्याएको थियो।