सेनेगलमा पहिलो पटक युवा ओलम्पिक प्रतियोगिता सुरु

सेनेगलमा शनिबारदेखि युवा ओलम्पिक खेलकुद औपचारिक रूपमा सुरु भएको छ। अफ्रिकी महाद्वीपमा पहिलो पटक ओलम्पिक प्रतियोगिता आयोजना भएको यो ऐतिहासिक अवसर हो, जसले अन्तर्राष्ट्रिय खेलकुद प्रतियोगिताहरूमा महाद्वीपको भूमिका बढाउने प्रयासलाई थप बल पुर्‍याएको छ। प्रतियोगिताको उद्घाटन समारोह भव्य रूपमा सम्पन्न भयो, जहाँ स्थानीय कलाकारहरूको कन्सर्ट र पश्चिम अफ्रिकी कथावाचन प्रस्तुत गरिएको थियो। परम्परागत पहिरनमा सजिएका कलाकारहरूले सामूहिक नृत्यमार्फत महाद्वीपको नक्सा निर्माण गर्दै स्थानीय संस्कृतिको प्रदर्शन गरेका थिए। समारोहमा खेलाडीहरूको मार्च पाससहित सयौंको संख्यामा रहेका बादवादक र नर्तकहरूले दर्शकहरूलाई मनोरञ्जन प्रदान गरेका थिए। प्रतियोगिताले यस क्षेत्रप्रतिको नकारात्मक धारणा चिर्न र विश्वसामु महाद्वीपको भिन्न स्वरूप प्रस्तुत गर्न मद्दत पुग्ने दर्शकहरूको आशा रहेको छ।