नेपाल प्रिमियर लिग: जनकपुर बोल्ट्सद्वारा पोखरा एभेन्जर्स ९ रनले पराजित

नेपाल प्रिमियर लिगअन्तर्गत आइतबार भएको खेलमा जनकपुर बोल्ट्सले पोखरा एभेन्जर्सलाई ९ रनले पराजित गरेको छ। कीर्तिपुरस्थित त्रिवि अन्तर्राष्ट्रिय क्रिकेट मैदानमा सम्पन्न उक्त प्रतिस्पर्धात्मक खेलमा पोखराले टस जितेर पहिले फिल्डिङ गर्ने निर्णय गर्दै जनकपुरलाई ब्याटिङको निम्तो दिएको थियो। जनकपुर बोल्ट्सले निर्धारित २० ओभरमा ७ विकेट गुमाउँदै १४७ रन खडा गरेको थियो। जनकपुरको इनिङ्समा त्रित राज दासले उत्कृष्ट ब्याटिङ गर्दै ५५ बलमा ६१ रन जोडे। यस्तै, अभिषेक तिवारीले १० बलमा २४ रनको विष्फोटक पारि खेले भने ओपनर मोइन अलीले १६ बलमा २१ रन बनाए। अलीलाई शाकिब अल हसनले आउट गराएका थिए। पोखराका तर्फबाट बलिङ गर्दै शाकिबले ३ ओभरमा ३ विकेट लिएका थिए भने चामिका करुणारत्नेले २ विकेट हात पारे। यसअघि प्रतियोगितामा जनकपुरले दुई खेलबाट एक जित र एक हार व्यहोरेको थियो भने पोखरा पहिलो खेलमा सुदूरपश्चिम रोयल्ससँग पराजित भएको थियो। १४८ रनको विजयी लक्ष्य पछ्याएको पोखरा एभेन्जर्स ९ विकेट गुमाएर १३८ रनमा रोकियो। टोलीका दुवै ओपनर सस्तैमा पभेलियन फर्किएपछि पोखराले सुरुवातमै धक्का व्यहोरेको थियो। दिनेश खरेल ९ बलमा ३ रन र माहेदी हसन ४ बलमा ८ रन बनाएर आउट भएपछि टोली आवश्यक लक्ष्यसम्म पुग्न सकेन।