काठमाडौँ उपत्यकामा मापसे र लागुऔषध सेवन गरी सवारी चलाउने ९८२ चालक कारबाहीमा

काठमाडौँ उपत्यकामा मादक पदार्थ तथा लागुऔषध सेवन गरी सवारी साधन चलाएको अभियोगमा ९८२ जना चालक कारबाहीमा परेका छन्। काठमाडौँ उपत्यका ट्राफिक प्रहरी कार्यालयका अनुसार ६ कात्तिकसम्मको १३ दिनको अवधिमा चलाइएको जाँच अभियानका क्रममा यी चालकहरूलाई कारबाही गरिएको हो। कारबाहीमा परेका कुल चालकहरूमध्ये ९४७ जना मादक पदार्थ सेवन गरेर सवारी साधन चलाइरहेको अवस्थामा फेला परेका थिए। सोही अवधिमा सञ्चालन गरिएको विशेष जाँचका क्रममा लागुऔषध सेवन गरी सवारी साधन चलाउने ३५ जना चालकलाई पनि कारबाही गरिएको छ। ट्राफिक प्रहरी कार्यालयको तथ्याङ्क अनुसार मादक पदार्थ सेवनको कारबाहीमा परेकामध्ये ५९ जना सार्वजनिक सवारी साधनका चालक रहेका छन्। त्यसैगरी, लागुऔषध सेवन गरी सवारी साधन चलाएको अभियोगमा कारबाहीमा परेका सबै ३५ जना पनि सार्वजनिक सवारी साधनकै चालक रहेको पाइएको छ। प्रहरी उपरीक्षक तथा कार्यालयका प्रवक्ता नरेशराज सुवेदीका अनुसार मादक पदार्थ वा लागुऔषध सेवन गरेर सवारी साधन चलाउनु गैरकानूनी कार्य हो। सोही आधारमा सम्बद्ध चालकहरूलाई प्रचलित ट्राफिक नियम अनुसार कारबाही गरिएको र यस्ता नियमन तथा निगरानी कार्यलाई आगामी दिनमा पनि निरन्तरता दिइने प्रहरीले जनाएको छ।