नेपाल प्रिमियर लिग: लुम्बिनी लायन्सद्वारा सुदूरपश्चिम रोयल्स सात विकेटले पराजित

साविक विजेता लुम्बिनी लायन्सले नेपाल प्रिमियर लिगमा विजयी सुरुआत गर्दै सुदूरपश्चिम रोयल्सलाई सात विकेटले पराजित गरेको छ। कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा सम्पन्न खेलमा साविक विजेता टोलीले दुईपटकको उपविजेता सुदूरपश्चिममाथि सहज जित निकालेको हो। यस खेल घरेलु क्रिकेटको इतिहासमा पहिलोपटक निर्णय समीक्षा प्रणाली (डीआरएस) को प्रयोगका लागि पनि स्मरणीय बनेको छ। खेलको पहिलो इनिङ्सको चौथो ओभरमा शेर मल्लको बलमा मैदानमा रहेका अम्पायरले आउटको निर्णय दिएपछि सुदूरपश्चिमका ब्याटर आरिफ शेखले पहिलोपटक रिभ्युको इसारा गरेका थिए। पहिले ब्याटिङ गरेको सुदूरपश्चिम रोयल्सका लागि ऐरीले सर्वाधिक २३ रनको योगदान दिएका थिए। तल्लो क्रमका बलर अनिल खरेल १५ रनमा अविजित रहेपछि टोलीले सम्मानजनक योगफल तयार पारेको थियो। बलिङतर्फ लुम्बिनीका शेर मल्लले उत्कृष्ट प्रदर्शन गर्दै टोलीका कप्तान रोहित पौडेलसँग सुरुवाती सफलताको खुसी साटेका थिए।