नेपाल प्रिमियर लिगको प्लेअफ समीकरण पूरा, चार टोली तय

नेपाल प्रिमियर लिगको तेस्रो संस्करणमा लिग चरणका खेलहरू सकिएसँगै प्लेअफमा पुग्ने चार वटा टोलीहरूको टुंगो लागेको छ। विराटनगर किङ्सलाई चार विकेटले पराजित गर्दै लुम्बिनी लायन्सले सात खेलबाट ११ अंक जोडी अंक तालिकाको शीर्ष स्थानमा रहन सफल भयो। यो जितसँगै साविक विजेता टोली पहिलो क्वालिफायरमा खेल्ने पक्का भएको छ। विराटनगर किङ्सले भने सात खेलबाट छ अंक मात्र जोड्दै आफ्नो अभियान टुङ्ग्यायो र प्रतियोगितामा अगाडि बढ्न असफल भयो। यता, सुदूरपश्चिम रोयल्स र काठमाडौं गोर्खाजले यसअघि नै प्लेअफमा स्थान सुरक्षित गरिसकेका थिए भने शनिवारको खेलको नतिजासँगै चितवन राइनो पनि प्लेअफमा पुग्ने अन्तिम टोली बन्यो। गएको संस्करणमा प्लेअफमा पुगेका चारमध्ये तीन वटा टोलीले चालू प्रतियोगितामा पनि सोही सफलता दोहोर्‍याएका छन्। लुम्बिनी लायन्स, सुदूरपश्चिम रोयल्स र काठमाडौं गोर्खाज दोस्रो संस्करणबाट यसपटक पनि छनोट भएका हुन्। यसैबीच, चितवन राइनो आफ्नो इतिहासमा दोस्रो पटक प्लेअफ चरणमा प्रवेश गरेको छ।