नेपालमा हरसाल ५० हजारभन्दा बढी मानिस मस्तिष्काघातबाट प्रभावित

डा पौडेलका अनुसार नेपालमा वार्षिक ५० हजारभन्दा बढी मानिस मस्तिष्काघातको शिकार हुने गरेका छन्। मस्तिष्कको कुनै भागमा रगतको प्रवाह रोकिएर अक्सिजन र आवश्यक पोषक तत्व पुग्न नपाउँदा मस्तिष्काघात हुने गर्दछ। रक्तनलीमा अवरोध सिर्जना भएपछि मस्तिष्कले आफ्नो कार्यसम्पादन नियन्त्रण गुमाउँछ। विश्वव्यापी रूपमा हेर्दा हरेक वर्ष १ करोड २० लाख मानिसमा यो स्वास्थ्य समस्या देखिने गरेको छ भने प्रभावितमध्ये आधा बिरामीको ज्यान जाने गरेको छ। नेपालको वर्तमान अवस्था अनुसार मस्तिष्काघात भएका बिरामीमध्ये १५ देखि २० प्रतिशतको मृत्यु हुने गरेको छ। डा पौडेलले यो आकस्मिक स्वास्थ्य अवस्थाका कारण एक तिहाइ बिरामीले अकालमै ज्यान गुमाउनुपरेको जानकारी दिनुभएको छ। यो जनस्वास्थ्य चुनौती अझ भयावह बन्न नदिन उहाँले सरकारलाई यस विषयमा प्राथमिकताका साथ ध्यान दिन आग्रह गर्नुभएको छ। देशमा मस्तिष्काघातको स्थिति विश्लेषण गर्न र प्रभावकारी उपचार विधिहरू खोज्न सन् २०१७ मा नेपाल स्ट्रोक एसोसिएसनको स्थापना गरिएको थियो। स्थापनाकालदेखि नै यस संस्थाले चेतनामूलक विभिन्न कार्यक्रमहरू सञ्चालन गर्दै आएको छ। मस्तिष्काघातका बिरामीको उपचार तथा व्यवस्थापनका लागि अन्तर्राष्ट्रिय मापदण्ड र कार्यविधिहरू तय गरी लागू भइरहेको डा पौडेलले उल्लेख गर्नुभएको छ।