काठमाडौँमा शोएब अख्तर सम्मानित

राजधानीको म्यारियट होटलमा आयोजित एक विशेष भेटघाट तथा स्वागत कार्यक्रममा पूर्वक्रिकेटर शोएब अख्तर सम्मानित भएका छन्। हिमालयन स्पोर्ट्सको आयोजनामा भएको उक्त समारोहमा खेलप्रेमी तथा विभिन्न विशिष्ट व्यक्तित्वहरूको उपस्थिति रहेको थियो। रावलपिंडी एक्सप्रेस उपनामले समेत चिनिने उक्त ख्यातिप्राप्त खेल व्यक्तित्वलाई सम्मान गर्नका लागि कार्यक्रम आयोजना गरिएको थियो। उक्त समारोहलाई सम्बोधन गर्दै नेपालका लागि पाकिस्तानी राजदूत मोहम्मद आमिर खानले विभिन्न पृष्ठभूमीका मानिसहरूलाई जोड्न खेलकुदले खेल्ने भूमिकामाथि जोड दिए। खेलकुदले दुई देशबीचको सांस्कृतिक समझदारी बढाउन र मित्रता गहिरो बनाउन सहयोग पुर्‍याउने वक्ताहरूको भनाइ थियो। भूगोलको सीमा नाघि मानिसहरूलाई एकताबद्ध गर्न खेलकुदको सार्वभौम क्षमता रहेको कार्यक्रममा औँल्याइयो। कार्यक्रमको अन्त्यमा सहभागीहरूले खेलकुद कूटनीतिको महत्त्वलाई स्वीकार गर्दै यस्ता सार्वजनिक कार्यक्रमहरूले जनता-जनताबीचको सम्बन्ध मजबुत बनाउने विचार व्यक्त गरे।