एनपीएल: पोखरा एभेन्जर्सविरुद्ध सुदूरपश्चिम रोयल्सको पहिले बलिङ

नेपाल प्रिमियर लिग (एनपीएल) अन्तर्गत बुधबार कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा सुदूरपश्चिम रोयल्स र पोखरा एभेन्जर्सबीच प्रतिस्पर्धा भइरहेको छ। खेलमा सुदूरपश्चिम रोयल्सले टस जितेर पहिले बलिङ गर्ने निर्णय गरेको छ। यो सुदूरपश्चिमको दोस्रो खेल हो भने पोखरा एभेन्जर्सको यस संस्करणको पहिलो खेल हो। दीपेन्द्रसिंह ऐरीको कप्तानीमा रहेको सुदूरपश्चिम रोयल्स पहिलो खेलमा साबिक विजेता लुम्बिनी लायन्ससँग पराजित भएको थियो। अघिल्ला दुई संस्करणमा फाइनलसम्म पुगेको सुदूरपश्चिम अझै पहिलो उपाधिको खोजीमा छ। उता कुशल भुर्तेलको कप्तानीमा रहेको पोखरा एभेन्जर्स एनपीएलका अघिल्ला दुवै संस्करणमा सुदूरपश्चिमसँग पराजित भएको थियो। पोखरा यसपटक सुदूरपश्चिमविरुद्ध पहिलो जित दर्ता गर्ने लक्ष्यमा छ। आठ टोलीको सहभागिता रहेको प्रतियोगिताको तेस्रो संस्करण २६ अक्टोबरदेखि सुरु भएको हो र यसको फाइनल २१ नोभेम्बरमा हुनेछ। तालिकाको शीर्ष स्थानमा लुम्बिनी लायन्स रहेको छ भने सुरुवाती जित दर्ता गरेका कर्णाली याक्स दोस्रो र चितवन राइनोज तेस्रो स्थानमा छन्।