नेप्सेको बैंकिङ उपसूचक दुई वर्षयताकै उच्च १,५८२ विन्दुमा

धितोपत्र दोस्रो बजारमा बैंकिङ समूहको उपसूचक १,५८२ विन्दुमा पुगेर दुई वर्षयताकै उच्च तहमा पुगेको छ। यो परिसूचक भदौ १० गतेको तुलनामा १०.९३ प्रतिशतले बढेको हो। दुई महिनाको अवधिमा वाणिज्य बैंकहरूको समग्र उपसूचक १० प्रतिशतले बढ्दा केही निर्दिष्ट बैंकहरूको शेयर मूल्य भने २५.८६ प्रतिशतसम्मले वृद्धि भएको छ। भदौ १० र कात्तिक ११ गतेबीचको मूल्य तुलना गर्दा लक्ष्मी सनराइज बैंकको शेयर मूल्य रु. २१६.९० बाट २५.८६ प्रतिशतले बढेर रु. २७३ पुगेको छ। त्यस्तै एनएमबी बैंकको शेयर मूल्य रु. २३७.५० बाट १५.३६ प्रतिशतले बढेर रु. २७४ पुगेको छ। प्राइम कमर्सियल बैंकको शेयर मूल्य रु. २३७.८० बाट १५.१३ प्रतिशतले बढेर रु. २७३.८० पुगेको छ। कृषि विकास बैंकको शेयर मूल्य रु. २९६ बाट १४.४९ प्रतिशतले बढेर रु. ३३८.९० पुगेको छ भने नेपाल इन्भेस्टमेन्ट मेगा बैंकको शेयर मूल्य रु. १८३.३० बाट १३.१४ प्रतिशतले बढेर रु. २०७.४० पुगेको छ। अन्य धेरै वाणिज्य बैंकहरूले पनि दोहोरो अङ्कको वृद्धि हासिल गरेका छन्। कुमारी बैंकको शेयर मूल्य रु. २१२.५० बाट १२.९४ प्रतिशतले बढेर रु. २४० पुगेको छ। नेपाल बैंकको शेयर मूल्य रु. २७१.७० बाट १२.६२ प्रतिशतले बढेर रु. ३०६ पुगेको छ भने सिटिजन्स बैंकको शेयर मूल्य रु. १९४ बाट १२.३७ प्रतिशतले बढेर रु. २१८ पुगेको छ। माछापुच्छ्रे बैंकको शेयर मूल्य रु. २४८ बाट ११.६९ प्रतिशतले बढेर रु. २७७ पुगेको छ र नेपाल एसबिआई बैंकको शेयर मूल्य रु. ३९९ बाट ९.७७ प्रतिशतले बढेर रु. ४३८ पुगेको छ। लाभांश समायोजनपछिको मूल्यमा पनि वृद्धि दर्ता भएको छ। १० प्रतिशत लाभांश समायोजन भएको ग्लोबल आइएमई बैंकको शेयर मूल्य रु. २४३.१० बाट १० प्रतिशतले बढेर रु. २५५.९० पुगेको छ। १० प्रतिशत लाभांश समायोजन भएको सानिमा बैंकको शेयर मूल्य रु. ३६५ बाट १० प्रतिशतले बढेर रु. ४०९.४० पुगेको छ। २० प्रतिशत लाभांश समायोजन भएको सिद्धार्थ बैंकको शेयर मूल्य रु. ४०८.५० बाट बढेर रु. ४३६ पुगेको छ। १५ प्रतिशत लाभांश समायोजन भएको नबिल बैंकको शेयर मूल्य रु. ५३६.८० बाट रु. ५४५ पुगेको छ भने १५ प्रतिशत लाभांश समायोजन भएको एभरेस्ट बैंकको शेयर मूल्य रु. ७२१ कायम भएको छ। नेपाल इन्भेस्टर्स फोरमका अध्यक्ष तुलसीराम ढकालले बैंकहरूको शेयर मूल्य तुलनात्मक रूपमा सस्तो भएकाले खरिदकर्ताको आकर्षण बढेको बताएका छन्। लगानीसम्बन्धी निर्णय लिनका लागि मूल्य-आम्दानी अनुपात आधारभूत सूचक भएको र समग्र शेयर बजारमा वाणिज्य बैंकहरूको यो अनुपात सबैभन्दा कम रहेको उनले स्पष्ट पारेका छन्।