एनपीएल: चितवन राइनोजद्वारा विराटनगर किंग्स आठ रनले पराजित

नेपाल प्रिमियर लिग प्रतियोगिताअन्तर्गत कीर्तिपुरस्थित त्रिभुवन विश्वविद्यालय अन्तराष्ट्रिय क्रिकेट मैदानमा मङ्गलबार, २७ अक्टोबर २०२६ मा सम्पन्न खेलमा चितवन राइनोजले विराटनगर किंग्सविरुद्ध आठ रनको जित निकालेको छ। टस जितेर ब्याटिङ गरेको चितवन राइनोजले २० ओभरमा सात विकेटको क्षतिमा १५७ रन बनाएको थियो। चितवनका लागि डेभिड मलानले सर्वाधिक ७० रन जोडे भने रवि बोपाराले अविजित ३१ र ड्यान मोस्लेले अविजित २९ रनको योगदान दिए। देव खनालले १२ रन र अर्जुन साउदले तीन रन बनाएका थिए। विराटनगर किंग्सका चार जना बलरले समान एक-एक विकेट लिएका थिए। १५८ रनको विजयी लक्ष्य पछ्याएको विराटनगर किंग्स १९.३ ओभरमा १४९ रनमा समेटियो। विराटनगरका ओपनर इमरान शेखले सर्वाधिक ३९ रन र अर्का ओपनर लोकेश बमले २६ रन बनाए। अलराउन्डर आन्द्रे रसेलले १७ बलमा ३३ रनको आक्रामक पारी खेले। उनी आउट हुँदा टोलीलाई जितका लागि २५ बलमा २६ रन आवश्यक थियो। एन्जेलो म्याथ्युजले १६ बलमा १४ रन बनाए। उनी र रुपेश कुमार सिंह १८औँ ओभरका अन्तिम दुई बलमा आउट भएका थिए। टोलीका लागि नरेन साउदले दुई रन बनाए भने अन्य तीन ब्याटरले खाता खोल्न सकेनन्। विराटनगर किंग्सले आठौँ विकेटका रूपमा पारिस जिसीलाई शून्य रनमा गुमाएपछि खेल रोमाञ्चक मोडमा पुगेको थियो। त्यतिबेला विराटनगरलाई अन्तिम दुई ओभरमा १७ रन चाहिएको थियो। एक समय टोलीलाई दुई विकेट बाँकी छँदा १० बलमा १६ रन आवश्यक परेको थियो। चितवन राइनोजका बलर कमल सिंह ऐरीले उत्कृष्ट बलिङ गर्दै चार विकेट लिएर विराटनगरको इनिङ्स समाप्त पारे र आफ्नो टोलीलाई आठ रनको जित दिलाए।