एनपीएलमा कर्णाली याक्सद्वारा जनकपुर बोल्ट्स १९ रनले पराजित

नेपाल प्रिमियर लिग (एनपीएल) अन्तर्गत कीर्तिपुरस्थित त्रिभुवन विश्वविद्यालयको क्रिकेट मैदानमा भएको खेलमा कर्णाली याक्सले जनकपुर बोल्ट्समाथि १९ रनको जित निकालेको छ। टस हारेर पहिले ब्याटिङ गर्न ओर्लिएको कर्णालीले निर्धारित २० ओभरमा ९ विकेट गुमाएर १३२ रन जोड्दै जनकपुरलाई १३३ रनको लक्ष्य दिएको थियो। कर्णालीका लागि अरिफुल इस्लामले २९ बलमा सर्वाधिक ४३ रन जोडे। टोलीले सुरुवातमै झटका व्यहोरेको थियो, जहाँ ४ रन जोड्दा पहिलो र थप १४ रन जोड्दा दोस्रो विकेट गुमेको थियो। जनकपुर बोल्ट्सका तर्फबाट हरमीत सिंहले ३ विकेट लिएका थिए। १३३ रनको लक्ष्य पछ्याउने क्रममा जनकपुर बोल्ट्सका ब्याटरहरूले कर्णालीको कसिलो बलिङसामु संघर्ष गरे। जनकपुरले मात्र १ रन बनाउँदा पहिलो विकेट गुमाएको थियो। टोलीका अनिल साहले १६ बलमा ११ रन र मोइन अलीले २२ बलमा १९ रन बनाएर आउट भए। कर्णालीका बलरले जनकपुरका कप्तान हरमीत र जिम्मीलाई एकै ओभरमा पेभेलियन फर्काएपछि जनकपुर टोली ११३ रनमा समेटियो।