पहिरोले जोमसोम–कोरला सडक अवरुद्ध, चीनतर्फको व्यापारिक कन्टेनर अलपत्र

लगातारको वर्षाले पहिरो खसेपछि मुस्ताङमा जोमसोमलाई कोरला नाकासँग जोड्ने सडक बन्द भएको जिल्ला प्रहरी कार्यालय मुस्ताङले जनाएको छ। नाका जोड्ने राष्ट्रिय राजमार्गमा तीन ठाउँमा पहिरो खसेको थियो: बारागुङ मुक्तिक्षेत्रको चैली गाउँमाथिको कालोभिरमा, कागबेनी–ताङ्वे सडकमा र अपर मुस्ताङको लो–घेकर दामोदरकुण्ड–२, घमीको सेल्फीडाँडा सडकमा। प्रहरी निरीक्षक सन्तोष बस्न्यालका अनुसार घमीको पहिरो हटाइसकिएको छ, तर चैलीको कालोभिर र कागबेनी–ताङ्वे खण्डमा गाडी चल्न सकेका छैनन्। कागबेनी प्रहरी चौकीबाट एउटा टोली कागबेनी–ताङ्वे सडकतर्फ गइसकेको छ। सडक बन्द हुँदा चीनसँगको आयात–निर्यातमा समस्या परेको र कोरला नाकातर्फ जाने तथा त्यहाँबाट फर्कने कन्टेनर पहिरो खसेको ठाउँमै रोकिएको बस्न्यालले बताए। जिल्लाकै बारागुङ मुक्तिक्षेत्र–१ को कागबेनी–मुक्तिनाथ सडक पनि पहिरोले अवरुद्ध भएको थियो, तर डोजर लगाएर खोलिएको वडाध्यक्ष प्रमेश गुरुङले जानकारी दिए। बेनी–जोमसोम–कोरला सडक आयोजनाकी प्रमुख तेजसी शर्माका अनुसार शुक्रबार राति बेनी–जोमसोम खण्ड करिब आधा दर्जन ठाउँमा अवरुद्ध भएको थियो। घासाको बगर खोल्सामा बाटो बारम्बार बन्द भइरहेको, काभ्रेभिरमा सडकमाथिबाट लगातार ढुङ्गा झरिरहेको र म्याग्दीको सिरुवारी, तातोपानी, रुपैसे र पोखरेबगरमा सडकमाथि पहिरो खसेको उनले बताइन्। सडक बन्द भएकाले चीनबाट आयात गरिएका सयौँ विद्युतीय सवारी जोमसोममा अड्किएका छन्। सम्भावित विपद्को जोखिमलाई ध्यानमा राख्दै जिल्ला प्रशासन कार्यालय मुस्ताङले दिउँसो सवारी नचलाउन अनुरोध गरेको छ।