अछाममा भीरबाट खसेर एक जनाको मृत्यु, एक घाइते

अछाम जिल्लाको ढकारी गाउँपालिका-१ बसल्ला स्थित भीरबाट खसेर गम्भीर घाइते भएका ३२ वर्षीय वीरखे बुढाको मङ्गलसेन जिल्ला अस्पतालमा उपचारका क्रममा मृत्यु भएको छ। स्थानीय साल्तोक्ता बजारबाट घर फर्कने क्रममा उक्त दुर्घटना भएको जिल्ला प्रहरी कार्यालयले पुष्टि गरेको छ। प्रहरी नायब उपरीक्षक पविन्द्रबहादुर बमका अनुसार दुवै जना भीरबाट करिब १५० मिटर तल खसेका थिए। घटनाको खबर प्राप्त हुनासाथ ढकारी प्रहरी चौकीबाट एक प्रहरी अधिकारीको नेतृत्वमा तीन सदस्यीय उद्धार टोली घटनास्थलमा खटाइएको थियो। उद्धार गरिएका वीरखे बुढालाई सुरुमा प्राथमिक उपचार गराएपछि थप उपचारका लागि मङ्गलसेनस्थित जिल्ला अस्पताल पठाइएकोमा शनिबार उपचारकै क्रममा उनको मृत्यु भएको अधिकारीहरूले जनाएका छन्। उक्त दुर्घटनामा सोही गाउँका ३१ वर्षीय गणेश बुढा घाइते भएका छन्। जिल्ला प्रहरी कार्यालयका अनुसार गणेशको स्थानीय ढकारी स्वास्थ्य चौकीमा उपचार गरिएको थियो। उनको स्वास्थ्य अवस्था सामान्य रहेकाले प्राथमिक उपचारपछि डिस्चार्ज गरिएको प्रहरीले पुष्टि गरेको छ।