विराटनगर किंग्सलाई हराउँदै लुम्बिनी लायन्स एनपीएलको प्लेअफमा प्रवेश

नेपाल प्रिमियर लिग (एनपीएल) अन्तर्गत शनिबार कीर्तिपुरस्थित त्रिभुवन विश्वविद्यालय क्रिकेट मैदानमा भएको खेलमा लुम्बिनी लायन्सले महत्त्वपूर्ण जित हात पारेको छ। यो जितसँगै प्रतियोगिताको प्लेअफ समीकरण पूरा भएको छ भने विराटनगर किंग्सको प्लेअफ पुग्ने सम्भावना आधिकारिक रूपमा समाप्त भएको छ। खेलमा लुम्बिनी लायन्सका कप्तान रोहित पौडेलले टस जितेर पहिले बलिङ गर्ने निर्णय लिएका थिए। पहिले ब्याटिङ गरेको विराटनगर किंग्सले निर्धारित २० ओभरमा ४ विकेट गुमाएर १६६ रन बनाउँदै लुम्बिनी लायन्ससामु १६७ रनको लक्ष्य प्रस्तुत गरेको थियो। विराटनगरका लागि सर्वाधिक रन बनाउने चरिथ असलंकाले ४३ बलमा १ चौका र ६ छक्काको मद्दतमा ६४ रनको अर्धशतकीय पारी खेले। अन्य ब्याटरहरूमध्ये शुभम रञ्जनेले ३१ रन बनाए भने ओपनिङ ब्याटर लोकेश बमले १७ बलमा १५ रन जोडे। विराटनगरको ब्याटिङका क्रममा ओपनर इमरान शेख २४ रन बनाएपछि रिटायर्ड हर्ट भएर मैदान छाड्न बाध्य भएका थिए। लुम्बिनी लायन्सका बलरहरूमध्ये किशोर महतो र रुबेन ट्रम्पेलम्यानले १–१ विकेट लिएका थिए। यस खेलअघि लुम्बिनी ६ खेलबाट ९ अंक जोड्दै तालिकाको दोस्रो स्थानमा थियो भने विराटनगर समान खेलबाट ६ अंकका साथ पाँचौँ स्थानमा रहेको थियो।