हिमपात र वर्षाले उच्च पहाडी जिल्लामा जनजीवन प्रभावित, मनाङमा पदयात्रा रोक

जुम्लाका स्थानीयका अनुसार तातोपानी गाउँपालिका-४ को वडा कार्यालयबाट करिब २४ किलोमिटर टाढाको पाटन क्षेत्रका विभिन्न ठाउँमा वर्षासँगै भारी हिमपात भइरहेको छ। जाजरकोटका उच्च भेगमा पनि लगातार वर्षा र हिमपातले चिसो बढेको छ। बारेकोटका चाखुरे पाटन र कुशे पाटनका खर्कमा हिउँ पर्न थालेपछि गोठालाहरूले चराउन लगिएका घोडा, खच्चड, भेडा र बाख्रा चिसोबाट जोगाउन तल्लो भेगमा झार्न थालेका छन्। भूकम्पले घर क्षति भएपछि अस्थायी टहरामा बसिरहेका परिवारलाई वर्षा र चिसोले थप कठिनाइ थपेको काठमाडौँ पोस्टले जनाएको छ। केही टहराभित्र पानी पसेर ओसिलो भएकाले न्यानो राख्न गाह्रो भएको छ। बालबालिका, वृद्धवृद्धा र बिरामीलाई चिसोको जोखिम बढी रहेको रिपोर्टमा उल्लेख छ। गोरखामा चुमनुब्री गाउँपालिका-१ को सामागाउँस्थित साम्दोमा शुक्रबार बिहान केही बेर हिमपात भयो। साम्दो सीमा चौकीका प्रहरी निरीक्षक दिनेश खड्काका अनुसार त्यसपछि तापक्रम घटेको छ। मनास्लु आधार शिविरमाथि भने दुई सातादेखि लगातार हिउँ परिरहेको छ, जसले मनास्लु आरोहण प्रभावित भएको छ र मनास्लु पदमार्गमा पदयात्रा रोकिएको छ। बिहीबार भारी वर्षा सुरु भएपछि जिल्लाका उत्तरी भेगमा हिउँ पर्न थालेको हो। माथिल्लो मनाङमा शुक्रबार बिहानैदेखि वर्षा र हिमपात भएको छ। स्थानीय प्यारालाल खड्काठोकीका अनुसार बिहानदेखि कहिले हिउँ र कहिले पानी परिरहेको छ। अन्नपूर्ण संरक्षण क्षेत्र आयोजना मनाङका क्षेत्र संरक्षण कार्यालय प्रमुख ढक बहादुर भुजेलका अनुसार डाँडाहरूमा हिउँ जमे पनि बस्ती र पदमार्गमा उल्लेख्य हिउँ जमेको छैन। सहायक प्रमुख जिल्ला अधिकारी कृष्णप्रसाद पौडेलका अनुसार करिब ३,३०० मिटर उचाइको हुम्दे र त्यसभन्दा माथि हिमपात भएको छ भने तल्लो भेगमा पानी परेको छ। हिमपातको जोखिम बढेपछि मनाङ जिल्ला प्रशासन कार्यालयले शुक्रबारदेखि आइतबारसम्म उच्च हिमाली क्षेत्रमा पदयात्रामा रोक लगाएको छ। यो रोक तिलिचो ताल, थोरोङ ला, आइस लेक, काङ ला र भीमथाङलगायत क्षेत्रमा लागू हुन्छ। पदमार्गमा रहेका पर्यटकलाई सुरक्षित स्थानमै बस्न र माथिल्लो भेगतर्फ नजान आग्रह गरिएको छ। नार्पा भूमि गाउँपालिकाका बस्ती र जिल्ला सदरमुकाम चामेमाथिका डाँडामा पनि हिउँ देखिएको पौडेलले बताए।