सुदूरपश्चिम रोयल्सको मुख्य प्रशिक्षकमा मिस्बाह-उल-हक नियुक्त

पाकिस्तानका पूर्वकप्तान तथा प्रशिक्षक मिस्बाह-उल-हक नेपाल प्रिमियर लिगको तेस्रो संस्करणका लागि सुदूरपश्चिम रोयल्सको मुख्य प्रशिक्षकमा आधिकारिक रूपमा नियुक्त भएका छन्। फ्रान्चाइजले सामाजिक सञ्जालमार्फत यो निर्णय सार्वजनिक गर्दै नयाँ प्रशिक्षकलाई स्वागत गरेको हो। नवनियुक्त प्रशिक्षकले अघिल्ला दुई संस्करणमा टोलीको नेतृत्व गरेका जगत टमाटाको स्थान लिनेछन्। पूर्वकप्तान मिस्बाहले आफ्नो अन्तर्राष्ट्रिय क्रिकेट करियरमा टेस्ट, एकदिवसीय र टी-२० तर्फ समग्रमा ११ हजारभन्दा बढी रन बनाएका थिए। उनले आफ्नाे देशतर्फबाट ७५ टेस्ट, १६२ एकदिवसीय तथा ३९ वटा टी-२० अन्तर्राष्ट्रिय म्याच खेलेको रेकर्डमा उल्लेख छ। जसमध्ये एकदिवसीयमा ५,१२२ रन र टी-२० अन्तर्राष्ट्रियमा ७८८ रन समावेश छन्। सन् २०१७ मा सक्रिय खेलाडी जीवनबाट सन्यास लिएपछि उनी प्रशिक्षण क्षेत्रमा प्रवेश गरेका थिए। टोलीको आधिकारिक सामाजिक सञ्जालमार्फत सार्वजनिक गरिएको भिडियोमा उनले प्रतियोगिताका लागि फ्रान्चाइजसँग सम्झौता गर्न पाउँदा खुसी व्यक्त गरेका छन्। सुदूरपश्चिम रोयल्समा उच्च स्तरका प्राविधिक सदस्यको आगमनसँगै टोली तेस्रो संस्करणको तयारीमा जुटेको छ।