उत्तरी गोरखाका बाढीपीडित परिवारलाई रेडक्रसद्वारा हेलिकप्टरबाट राहत

नेपाल रेडक्रस सोसाइटीले चाडपर्वको अवधिभर उत्तरी गोरखास्थित चुमनुव्री गाउँपालिकाका बाढीप्रभावित घरपरिवारलाई निरन्तर रूपमा राहत वितरण गरिरहेको छ। हालै आएको बाढीले स्थानीय बस्तीहरूमा क्षति पुर्‍याएको तथा आवतजावत गर्ने बाटाहरू अवरुद्ध बनाएपछि विकट हिमाली क्षेत्रका धेरै बासिन्दा जोखिमपूर्ण अवस्थामा परेका थिए। बुढीगण्डकी नदीमा आएको भीषण बाढीका कारण चुमनुव्री जोड्ने सडक तथा पदमार्ग पूर्ण रूपमा अवरुद्ध भएका छन्। समुदायसँगको स्थलगत सम्पर्क पूर्णतया टुटेपछि बाटो नभएर अलपत्र परेका परिवारहरूसम्म पुग्नका लागि हेलिकप्टरमार्फत गाउँपालिकासम्म आवश्यक राहत सामग्री ढुवानी गर्नुपरेको हो। भौगोलिक कठिनाइ र विकट परिस्थितिले गर्दा ढुवानी प्रक्रिया जटिल बनेको भए पनि प्रभावित क्षेत्रहरूमा स्थानीय आवश्यकता अनुसार सामग्री उपलब्ध गराउन आकस्मिक कार्यसञ्चालनमार्फत समन्वय भइरहेको छ। नेपाल रेडक्रस सोसाइटीका अध्यक्ष डा विशालकुमार भण्डारीले चुनौतीपूर्ण अवस्थाका बाबजुद पीडित समुदायलाई आवश्यक सहायता पुर्‍याउने प्रतिबद्धता संस्थाले जारी राखेको जानकारी दिनुभएको छ।