डा. सञ्जय खड्गीलाई फ्लोरेन्समा प्रतिष्ठित अन्तर्राष्ट्रिय सम्मान

वरिष्ठ मूत्ररोग विशेषज्ञ डा. सञ्जय खड्गीलाई इटालीको फ्लोरेन्समा आयोजित एक विशेष कार्यक्रममा अन्तर्राष्ट्रिय डिस्टिङ्गुइस्ड करियर अवार्डबाट सम्मानित गरिएको छ। मूत्ररोग चिकित्सा क्षेत्रमा उनले पुर्याएको लामो समयको सेवा, उपचार प्रविधिको विकास र सीमापार ज्ञान आदानप्रदानमा गरेको योगदानको कदर गर्दै यो पुरस्कार प्रदान गरिएको हो। सम्मान ग्रहण गरेपछि आफ्नो प्रतिक्रिया दिँदै डा. खड्गीले एसआईयूका पदाधिकारी, पुरस्कार छनोट समिति तथा आफ्नो चिकित्सा यात्रामा सहयोग गर्ने शिक्षक, सहकर्मी र अन्य पेसाकर्मीहरूप्रति कृतज्ञता व्यक्त गरेका छन्। उनले विश्वमञ्चमा यो उपलब्धि हासिल गर्न पाउँदा गर्व महसुस भएको बताएका छन्। आफ्नो चिकित्सा करियरको क्रममा डा. खड्गीले हजारौं जटिल मूत्रसम्बन्धी शल्यक्रियाहरू सफलतापूर्वक सम्पन्न गरेका छन्। सन् २००५ देखि मिनी-पिसिएनएल प्रविधिसँग जोडिएका उनका कार्यहरू यस क्षेत्रमा महत्त्वपूर्ण मानिन्छन्। यसबाहेक, उनले एयूए र एसआईयू लगायतका संस्थाहरूद्वारा आयोजित अन्तर्राष्ट्रिय मञ्चहरूमा मूत्ररोग तथा एण्डोयुरोलोजीका विषयमा नियमित रूपमा प्रस्तुतीकरणसमेत दिँदै आएका छन्।