काठमाडौं हर्टर फिल्म फेस्टिभलको दोस्रो संस्करणमा २६ चलचित्र छनोट

काठमाडौं हर्टर फिल्म फेस्टिभलको दोस्रो संस्करणका लागि खुला आह्वानमार्फत २६ वटा चलचित्र आधिकारिक रूपमा छनोट गरिएको छ। नेपाल फिल्म तथा संस्कृति एकेडेमीको आयोजनामा आगामी ३० अक्टोबरदेखि १ नोभेम्बरसम्म उक्त महोत्सव सञ्चालन हुनेछ। काठमाडौंको रसियन हाउसमा हुने स्क्रिनिङमार्फत स्थानीय दर्शकहरूले विभिन्न विधाका चलचित्रहरू हेर्न पाउनेछन्। यो महोत्सव पूर्ण रूपमा हर्टर, थ्रिलर, सुपरन्याचुरल, डार्क फेन्तासी र लोककथामा आधारित चलचित्रहरूमा केन्द्रित रहेको छ। छनोट भएका चलचित्रहरूमा स्वदेशी तथा अन्तर्राष्ट्रिय दुवै प्रकारका प्रस्तुतिहरू समावेश छन्, जसले दर्शकहरूलाई परम्परागत विषयवस्तुमा आधारित स्थानीय कथा तथा वैश्विक कथा वाचनको मिश्रण अनुभव गराउनेछ। राजधानीमा हुन लागेको यो फेस्टिभलको दोस्रो संस्करणले अन्तर्राष्ट्रिय विधागत स्रष्टा र स्थानीय चलचित्रप्रेमीहरूबीच सम्बन्ध स्थापित गर्ने उद्देश्य राखेको आयोजकले जनाएका छन्। यस प्रदर्शनले फिचर लेन्थ र छोटा चलचित्रहरू दुवैलाई विशेष मञ्च प्रदान गर्नेछ।