कीर्तिपुर खेलमा विराटनगरद्वारा सुदूरपश्चिम पराजित

कीर्तिपुरस्थित त्रिवि अन्तर्राष्ट्रिय क्रिकेट मैदानमा शनिबार साँझ सम्पन्न ओभर घटााइएको खेलमा विराटनगरले सुदूरपश्चिमलाई पराजित गरेको छ। टस हारेपछि पहिले ब्याटिङको निम्तो पाएको विराटनगरले निर्धारित पाँच ओभरको खेलमा दुई विकेट गुमाउँदै १०५ रनको उच्च योगफल तयार पारेको थियो। विराटनगरका ब्याटरहरूले इनिङ्सको सुरुवातदेखि नै आक्रामक ब्याटिङ गरेका थिए। ओपनर सेफ जेबले १० बलमा दुई छक्काको मद्दतले १७ रन बनाए। टोलीका लागि शेहान जयसूर्याले सर्वाधिक ३९ रनको योगदान दिए। उनले ११ बलको सामना गर्दै दुई चौका र पाँच छक्का प्रहार गरेर तेस्रो ओभरमा आउट भएका थिए। तेस्रो नम्बरमा ब्याटिङ गर्न आएका आन्द्रे रसेलले १० बलमा दुई चौका र तीन छक्का प्रहार गर्दै अविजित २९ रन बनाए। १०६ रनको विजयी लक्ष्य पछ्याएको सुदूरपश्चिमले पाँच ओभरमा आठ विकेट गुमाएर ७० रन मात्र बनाउन सक्यो।