तिहार र छठ नजिकिँदै गर्दा सिराहामा वर्षाले सयपत्री फूल नष्ट

तिहार, लक्ष्मीपूजा र छठ पर्वलाई लक्षित गरेर सिराहामा लगाइएको सयपत्री फूल लगातार दुई दिन परेको वर्षाका कारण नष्ट भएको छ। किसानहरूले फूल टिपेर बजार पठाउने तयारी गरिरहेका बेला परेको पानीले महिनौँको मिहिनेत खेर गएको छ। गोलबजार नगरपालिका–३ मा विगत १५ देखि २० वर्षदेखि फूल खेती गर्दै आएका मानु स्याङ्दानले यस याममा ४ कट्ठा जग्गामा सयपत्री रोपेका थिए। निरन्तरको वर्षाका कारण खेतमै करिब २,५०० वटा फूलका बोट ढलेका छन्, जसले गर्दा उनको सुरुवाती लगानी र अपेक्षित आम्दानी दुवै गुमेको छ। त्यसैगरी गोलबजार नगरपालिका–६ का अर्का किसान रुदल नायकले लगाएको करिब ६ कट्ठामध्ये ३ देखि ४ कट्ठाको सयपत्री बाली वर्षाले नष्ट गरेको बताएका छन्। चाडपर्वका बेला आम्दानी गर्ने उद्देश्यले पुष्प व्यवसायमा लगानी गरेका स्थानीय किसानहरू उत्पादनमा क्षति पुगेपछि लगानी समेत उठाउन नसक्ने चिन्तामा छन्।