ललझाडी कप फुटबल प्रतियोगिता आगामी नोभेम्बरमा हुने

आयोजक ललझाडी युवा क्लब ११ ले सोमबार आयोजित पत्रकार सम्मेलनमार्फत दसौँ ललझाडी कप फुटबल प्रतियोगिता आगामी ३ नोभेम्बरदेखि ११ नोभेम्बरसम्म सञ्चालन हुने जानकारी दिएको छ। कञ्चनपुरमा आयोजित हुने यस खेलकुद प्रतियोगितामा विभिन्न टोलीहरूबीच प्रतिस्पर्धा हुनेछ। प्रतियोगिताको महिलातर्फको विजेता टोलीले नगद रु. ५० हजार प्राप्त गर्नेछ भने उपविजेता बन्ने टोलीले ट्रफी, मेडल र प्रमाणपत्रसहित रु. २५ हजार हात पार्नेछ। यसैगरी, प्रतियोगिताको सर्वोत्कृष्ट खेलाडीलाई रु. २५ हजार पुरस्कार प्रदान गरिनेछ। व्यक्तिगत विधातर्फ उत्कृष्ट गोलरक्षक, उत्कृष्ट रक्षक, उत्कृष्ट मिडफिल्डर, सर्वाधिक गोलकर्ता, उददीयमान खेलाडी र उत्कृष्ट प्रशिक्षकलाई जनही रु. १० हजार पुरस्कार दिइनेछ। कञ्चनपुरमा आयोजित पत्रकार अन्तरक्रियाका क्रममा आयोजकले पुरस्कारको सम्पूर्ण विवरण सार्वजनिक गरेका हुन्।