चितवन राइनोजलाई हराउँदै सुदूरपश्चिम रोयल्सको दोस्रो जित

कीर्तिपुरस्थित त्रिभुवन विश्वविद्यालय क्रिकेट मैदानमा सोमबार भएको खेलमा सुदूरपश्चिम रोयल्सले चितवन राइनोजमाथि पाँच विकेटको जित निकालेको छ। टस हारेर पहिले ब्याटिङको निम्तो पाएको चितवन राइनोजले निर्धारित २० ओभर खेल्दै छ विकेटको क्षतिमा १२९ रन जोडेको थियो। चितवनका लागि चौथो नम्बरमा मैदान प्रवेश गरेका रवि बोपाराले उत्कृष्ट ब्याटिङ गरे। उनले ४० बलको सामना गर्दै तीन चौका र दुई छक्कासहित ४९ रनको योगदान दिए। बोपाराको टोलीले सुदूरपश्चिमसामु १३० रनको लक्ष्य प्रस्तुत गरे तापनि त्यसलाई जोगाउन भने असफल रह्यो। सुदूरपश्चिम रोयल्सले १६.४ ओभरमै पाँच विकेट गुमाएर १३१ रन बनाउँदै लक्ष्य पूरा गर्‍यो। विजेता टोलीका लागि ब्रान्डन म्याकमुलनले २१ बलमा ४३ रन जोड्दै आक्रामक पारी खेले। उनको सो पालीमा छ वटा चौका र दुई वटा छक्का समावेश थिए। यस जितसँगै सुदूरपश्चिम रोयल्सले चार खेलमध्ये दोस्रो सफलता हात पारेको छ। यसअघि खेलेका दुई खेलमा भने टोली लुम्बिनी लायन्स र विराटनगर किङ्ससँग पराजित भएको थियो।