स्याङ्जामा स्कुटर दुर्घटना हुँदा चालकको मृत्यु

स्याङ्जा जिल्लाको बिरुवा गाउँपालिकामा शुक्रबार दिउँसो भएको स्कुटर दुर्घटनामा चालकको मृत्यु भएको छ। रंगखोला-बिरुवा सडक खण्डअन्तर्गत पर्ने वडा नम्बर ३ को थान्ती भन्ने स्थानमा स्कुटर सडकबाट अनियन्त्रित भई करिब ५० मिटर तल खसेको स्थानीय प्रहरी रेकर्डले जनाएको छ। बिरुवा गाउँपालिका वडा नम्बर २ की ३९ वर्षीया महिला चालकको घटनास्थलमै मृत्यु भएको प्रहरीको भनाइ छ। जिल्ला प्रहरी कार्यालय स्याङ्जाका सूचना अधिकारी रमेश दत्त अवस्थीका अनुसार चालकले स्कुटरको नियन्त्रण गुमाएका कारण दुर्घटना भएको प्रारम्भिक अनुसन्धानबाट खुल्न आएको छ। दुर्घटनाका बेला स्कुटरमा सवार रहेका एक किशोर भने सकुशल रहेका छन्। घटनापश्चात जिल्ला र ट्राफिक प्रहरी कार्यालयबाट खटिएको टोलीले घटनास्थल पुगी अवस्था नियन्त्रणमा लिएपछि उक्त सडक खण्डमा यातायात सञ्चालन सुचारु भएको थियो। दुर्घटनाको कारणबारे थप अनुसन्धान भइरहेको र प्रहरी टोलीले घटनाका सबै विवरणहरू अध्ययन गरिरहेको अधिकारीहरूले बताएका छन्।