भदौमा मुद्रास्फीति दर बढेर ६.३४ प्रतिशत पुग्यो

चालू आर्थिक वर्षको भदौ महिनामा सार्वजनिक गरिएको विवरण अनुसार उपभोक्ता मुद्रास्फीति दर बढेर ६.३४ प्रतिशतमा पुगेको छ। गएको आर्थिक वर्षको सोही महिनामा उपभोक्ता मूल्य वृद्धिको यो दर १.८७ प्रतिशत मात्र रहेको थियो। समीक्षा अवधिमा खाद्य तथा पेय पदार्थ समूहअन्तर्गतका वस्तुहरूको मूल्यमा उल्लेखनीय वृद्धि भएको छ। वार्षिक बिन्दुगत आधारमा घ्यू तथा तेलको मूल्य १६.६८ प्रतिशतले बढेको छ भने फलफूलको मूल्य १५.९९ प्रतिशत र चिनी तथा चिनीजन्य वस्तुहरूको मूल्य १२.१४ प्रतिशतले उकालो लागेको छ। यसैगरी खाद्य क्षेत्रका अन्य उपसमूहहरूमा माछा तथा मासुको मूल्य ७.३४ प्रतिशत, तरकारीको मूल्य ७.०७ प्रतिशत र मसलाको मूल्य ६.७१ प्रतिशतले बढेको छ। भौगोलिक क्षेत्रगत आधारमा हेर्दा भदौ महिनामा काठमाडौं उपत्यकामा वार्षिक बिन्दुगत उपभोक्ता मुद्रास्फीति ५.२८ प्रतिशत, तराईमा ६.८९ प्रतिशत, पहाडमा ६.४१ प्रतिशत र हिमालमा ५.६९ प्रतिशत रहेको छ।