सिम रेसिङ च्याम्पियनसिपमा जयप्रताप र कुशल विजयी

NASA नेपालको आयोजनामा सम्पन्न नेपाल सिम रेसिङ राष्ट्रिय च्याम्पियनसिपमा जयप्रताप मास्क र कुशल भण्डारीले मुख्य उपाधि जितेका छन्। विभिन्न विद्यालय र कलेजका विद्यार्थीहरूको सहभागिता रहेको यस रेसिङ प्रतियोगितामा सहभागीहरूले विभिन्न वर्गमा आफ्नो प्रतिस्पर्धा प्रस्तुत गरेका थिए। वरिष्ठ विधामा जयप्रताप मास्कले पहिलो स्थान हासिल गरे भने निमन शाक्य उपविजेता बने। यसैगरी विद्यार्थीहरूका लागि आयोजित कनिष्ठ रुकी विधामा कुशल भण्डारी पहिलो स्थानमा रहन सफल भए। सोही विधामा स्पर्श ब्यञ्जू दोस्रो र विनीत महर्जन तेस्रो स्थानमा रहे। प्रतियोगितामा भेट्रान च्यालेन्ज वर्ग जस्ता अतिरिक्त खण्डहरू पनि समावेश गरिएको थियो। प्रतियोगितामा चालकहरूले घडीको विपरीत दिशातर्फ १३ वटा मोड र आठ ल्याप सहितको ३.१ किलोमिटर लामो ट्र्याकमा ड्राइभिङ गरेका थिए। वरिष्ठ विजेता जयप्रताप मास्कले १ मिनेट २२ सेकेन्डमा आफ्नो उत्कृष्ट ल्याप पूरा गरे। विधाका विजेता तथा शीर्ष स्थान हासिल गर्ने खेलाडीहरूलाई पदक, प्रमाणपत्र र नगद पुरस्कार प्रदान गरिएको थियो जसमा वरिष्ठ विजेताले रु. १२,००० र दोस्रो स्थान हासिल गर्नेले रु. ६,००० प्राप्त गरे।